Syair Saraba Ampat

Allah jadikan saraba ampat
Syariat, Thariqat, Hakikat, Makrifat
Manjadi satu dalam khalwat
Rasa nyamannya tiada tasurat

Huruf Allah ampat banyaknya
Alif i'tibar daripada Zat-nya
Lam awal dan akhir Sifat dan Asma-Nya
Ha isyarat dari Af'al-Nya

Jibril Mikail malaikat mulia
Isyarat sifat Jamal dan Jalal
Izrail Israfil serupa pasangannya
I'tibar sifat Qahar dan Kamal

Jabar Ail asal katanya
Bahasa Suryani asal mulanya
Kebesaran Allah itu artinya
Jalalullah bahasa Arabnya

Nur Muhammad bamula nyata
Asal jadi alam semesta
Seumpama api dengan panasnya
Itulah Muhammad dengan Tuhannya

Api dan banyu, tanah dan hawa
Itulah dia alam dunia
Manjadi awak berupa rupa
Tulang sungsum daging dan darah

Manusia lahir ke alam insan
Di alam ajsam ampat bakawan
Si Tubaniyah dan Tambuniyah
Uriah lawan Si Camariah

Rasa dan akal, daya dan nafsu
Di dalam raga nyata basatu
AKU meliputi segala liku
Matan hujung rambut ka hujung kuku

Tubuh dan hati, nyawa rahasia
Satu yang zhohir amat nyatanya
Tiga yang batin pasti adanya
Alama Shoghir itu sabutnya

Mani, manikam, madi dan madzi
Titis manitis jadi manjadi
Si Anak Adam balaksa kati
Hanya yang tahu Allahu Rabbi

Ka ampat ampatnya kada tapisah
Datang dan bulik kepada Allah
Asalnya awak daripada tanah
Asalpun tanah sudah di syarah

Dadalang simpur barmain wayang
Wayang asalnya sikulit kijang
Agung dan sarun babun dikancang
Kaler bapasang di atas gadang

Wayang artinya si bayang-bayang
Antara kadap si lawan tarang
Samua majaz harus di pandang
Simpur balalakun hanya saorang

Samar, Bagung si Nalagaring
Si Jambulita suara nyaring
Ampat isyarat amatlah panting
Siapa handak mancari haning
( Syair Datu Sanggul )